💭 前言
聽過唔少家長都有遇到以下問題：「我日日都有同小朋友講嘢，但係點解佢好似都唔太應我？」、「係咪我問得唔夠多？定係應該教佢多啲字？」
如果你都有諗過以上問題，你並唔孤單。
好多家長都好努力想幫小朋友學講嘢，但往往忽略咗一樣好重要嘅事——親子互動，其實唔只係「講說話」。
👩🏼👦🏼 甚麼是「親子互動」呢？
親子互動，唔等於你問一句、小朋友答一句。真正嘅互動，係關係嘅建立，係一來一往之間，令小朋友感受到：
- 你有留意我
- 你明白我
- 同你一齊係安全、舒服嘅
而呢種互動，可以分成兩大部分：
- 言語互動：你點樣用說話回應小朋友
- 非言語互動：你點樣用眼神、動作、等待同佢溝通
兩樣都重要，缺一不可✨
言語互動: 唔只係靠「問問題」
好多人一諗到幫小朋友學語言，第一反應就係：「問多啲問題啦！」
但其實——不停問問題，未必一定幫到小朋友講多啲。有時，小朋友反而會覺得有壓力，當小朋友唔知點答，就會索性唔講。
言語互動，更重要嘅係：
- 你有冇接住佢講嘅嘢
- 你有冇幫佢「講完整」
- 你有冇描述緊佢正在做嘅事
當小朋友感覺到「我講嘢係有人聽」，佢自然會想再講多啲。
非言語互動：語言未出現前，已經開始
對於未講到、或者講得唔多嘅小朋友，非言語互動更加係關鍵。
其實小朋友一早已經喺度溝通緊，只係未用到說話：
- 望住你
- 拉你隻手
- 指住想要嘅嘢
- 用表情、動作表達感覺
如果大人能夠：
- 跟隨佢嘅興趣
- 放慢節奏，等一等
- 用動作同表情回應
就等於同佢講緊一句好重要嘅說話：「我見到你，我同你一齊。」
而呢份被理解嘅感覺，正正就係語言發展嘅基礎。
為何要同時重視「言語」同「非言語」？
可以咁諗：
👉 非言語互動係地基
👉 言語互動係慢慢起上嚟嘅牆
如果做好基本功，小朋友會更有安全感去嘗試講嘢；如果牆起得太快，但地基未穩，反而容易令小朋友退縮。
所以，唔係揀一樣做，而係因應小朋友嘅階段，調整你嘅互動方式。
我應該由邊度開始？
你可以簡單咁分：
- 如果小朋友已經有說話
👉 可以先重溫「言語互動技巧」 - 如果小朋友講得唔多，或者未講
👉 可以先由「非言語互動」開始
🪄無論由邊度開始，都唔需要一次過做晒，一個小改變，已經可以好有幫助。
一句想同家長講嘅話
Be with the child before teaching the words.
先陪伴，再教說話。
你唔需要做得完美，只需要願意同小朋友一齊。
🪄親子互動技巧清單下載:
清單已包含十多項親子互動的技巧，方便大家下載後可即刻使用，清單僅供教學及個人使用，請勿未經授權公開或商業用途
📌 延伸閱讀
💛 關於 ChattyJolly
由香港言語治療師創立，希望創作簡單、有效、實用遊戲教材，提升小朋友語言理解、表達能力。
